بقلم الإعلامية نرمين فتحي
لما الاهتمام يبقى تمثيل… والقلب يصدّق.
الست اللي بتتعلق بأول اهتمام… وتتفاجئ إنه تمثيل.
مش لأنها ساذجة… ولا لأنها قليلة خبرة.
لأ… لأنها محتاجة تتحب.
ولما القلب يكون جعان… بيصدق أول لقمة اهتمام تتقدّم له.
الاحتياج بيعمي…
بيخلّي الست تشوف اللمعة مش الحقيقة.
تشوف الكلمة الحلوة… مش نبرة الصوت.
تشوف الاهتمام… مش نية صاحبه.
وتصدق إن اللي قدامها مختلف… وهو يمكن بيجرّب حظه بس.
المشكلة إن كتير من الرجالة بيعرفوا يدخلوا من باب الاحتياج…
عارف إنك موجوعة…
وعارف إنك مستنية حد يحتويك…
فيظهر فجأة، ويعمل دور البطل، ويختفي أول ما ياخد اللي هو عايزه:
إعجابك… وثقتك… وتمسكك بيه.
طيب إزاي نعرف الفرق بين اللي مهتم بجد… واللي بيجرّب وجوده؟
اللي مهتم بجد ما بيظهرش ويختفي… بيكمّل.
اللي مهتم بجد مش بيستعجل… بيبني العلاقة مش بيخطفها.
اللي مهتم بجد بيسأل بصدق… مش بيقول كلام معلب.
اللي مهتم بجد مسؤول… مش بيرمي الكلام ويروح.
اللي مهتم بجد بيسعى… مش بيستنى أنتِ اللي تلوّحي وتثبّتي وجوده.
احفظي دي كويس:
اللي داخل بجد… خطواته ثابتة.
واللي داخل يتمثّل… صوته أعلى من أفعاله.
مترهقيش قلبك مع كل واحد يعمل دور المهتم…
واهتمي باللي اهتمامه يِتْقاس بالأفعال… مش باللعب على الاحتياج.