بقلم هبة حسين
كلها بتكون ترتبيات فى المخطط الإلهي وفى التوقيت الإلهي.
حتى خروجهم من حياتنا بردوا كلها فى المخطط الإلهي وفى التوقيت الإلهي.
كل شخص بيظهر فى حياتنا بيكون ليه سبب و دور ومهمه و درس ربنا بعتوا لينا من خلاله الشخص ده.
ومع كل درس جديد بنتعلمه من خلال الأشخاص اللى بيظهروا فى حياتنا إحنا بنتعلم اللى يفيدنا فى اللى باقى من عمرنا.
دروس بنتعلم منها إنها تساعدنا فى حياتنا وبتغير معتقداتنا وأفكارنا وبتشكل نسخ جديده مننا ومن شخصيتنا ومن تصرفاتنا.
بعض الأشخاص دخولهم فى حياتنا بيكون بشكل ايجابى بيضيف لينا سعاده وبهجه وحب ودعم نفسى فى فترات صعبه من حياتنا.
وأشخاص تانيه نتعلم منهم خبرات ايجابيه ونصائح وحكم ومواعظ تفيدينا وتحمينا.
ممكن بردوا يتحط فى طريقنا شخص يزعلنا ويضايقنا علشان نعرف قيمة الناس اللى فى حياتنا اللى بيحبونا بجد حب حقيقى وقلوبهم كلها طيبه وحنيه علينا وخوف علينا.
كنا محتاجين نتعلم ازاى نتميز ما بين الحب المزيف والحب الحقيقى.
لأن الاشخاص المزيفه ومدعين المحبه كتير لكن اللى بيحبوك حب حقيقى و بصدق وبإخلاص أفعالهم هى اللى بتثبت صدق مشاعرهم الحقيقيه.
الشخص الناضج و الواعى هو اللى بيكون فاهم ومدرك إن مش معنى إن الدور إنتهى وكل واحد راح فى طريق.
يبقى اللى مشى يبقى شخص سيئ.
الفكره إن ربنا بيسبب الأسباب علشان الشخص ده يبعد ويمشى فى التوقيت ده لأن دوره إنتهى من حياتك.
و ربنا كاتب ليه أدوار تانيه فى حياة أشخاص تانيه غيرك.
وكذلك أشخاص تانيه ليهم أدوار تانيه فى حياتك إنت كمان.
فلازم نتقبل فكرة إن مافيش حد دايم فى حياة حد طول العمر.
وان حياتنا مش بتوقف على خروج الأشخاص من حياتنا.
ولازم نتقبل فكره إن أى شخص موجود فى حياتنا حاليا مش مقدر ليه يكون معانا فكل مراحل حياتنا.
ولازم نتوقع أى شئ من اى شخص ولازم ننزل بسقف توقعاتنا فى الآخرين علشان نقلل واقع الصدمه على نفسنا.
وإللى لازم تعرفوا إن اللى هيكمل معاك طول حياتك وعمرهم ما هيسبوك أبدا هما ربنا ونفسك وبس.
لذلك علاقتك بربنا وبنفسك حسنهم وحافظ عليهم على قد ما تقدر.
خليك متصل مع ربنا دايما عن طريق الصلاه والدعاء.
وحب نفسك وحافظ على سلامك النفسى وإختار بعنايه الأشخاص اللى يكونوا فى دايرة حياتك.
اطلق سراح الأشخاص اللى فى حياتك وسيب كل واحد على راحته زاى ما انت كمان تختار اللى يريحك.