بقلم باسمة فاروق
شخص اناني بيقرر يحطك تحت سيطرته لانه بيفكر دايما أنه صح في كل قرار بياخده حتي لو قرار بيظلمك
حتي لو طريقه تربيه بتظلمك حتي لو جوازه بتظلمك حتي لو صداقه بتظلمك
ف تلاقي نفسك في وحده غير مبررة
طفل وحيد مسروق منه ونس الاصحاب لانك من وجهه نظره انت مابتعرفش تختار اصحابك
ملزم يربيك بطريقته الغلط في التربيه وانت بس اللي بتدفع تمن ده طول عمرك لحد اللحظه اللي هتستوعب فيها لحد الوقت اللي هتقاوم فيه وتحاول تتعافي
طفل وحيد مسروق منه ونس العيله لانك ورث منه كره العيله و العلاقات المسموسه فيها
شاب وحيد مسروق منه ونس أصحاب العمر و العشره وونس الأهل لأنك في دايره الخوف
الخوف من الاختيار والمواجهة الخوف من الكلام و الخوف من أصحاب السوء في سن حساس محروم من التجربه ذاتها
شريك حياه مسروق منه الونس لانك دايما مستني الونس من الاخر
الآخر في الأغلب شخص مستقل بأهله باصحابه بمساحته الشخصيه المستقله عنك
وبيغلب عليه طابع الانانيه لظروف مجتمعيه بتنحاز لجنس معين
سارق الونس هو شخص بيعاني من الخوف ولأنه قرر أنه يستمر مع خوفه
ف هو قرر أنه يسحلك معاه في الخوف ده عمدا أو دون وعي
اكتشافك انك شخص مسروق منه الونس في الحياه هتفهمه بالتدريج
بس قبل ما تفهمه هتقع كتير في مطب انا ليه بحس باختلافات كتيره بيني وبين اللي حواليا
ليه مش عارف اكون علاقات سويه
ليه مش حاسس اني مرتاح
ليه حاسس بوحده كبيره رغم اني بحب الناس و التفاعل معاهم
ليه بيتم استغلالي في بعض العلاقات مع بعض الناس الغير سويه
ليه مش مرتاح بعلاقتي مع شريك حياتي
ليه حاسس بالتقصير دايما مع اولادي
ليه بلوم دايما علي طفولتي وطريقه تربيتي و طريقه رد فعلي تجاههم
اصعب مرحله في اكتشافك انك شخص اتسرق منه الونس في حياته
لما تكتشف انك شخص بيسرق الونس من ولاده لانك بتطبق نفس الطريقه اللي اتربيت بيها معاهم دون وعي
ايه تاني
لما تكتشف انك ليك دور كبير انك تعرف ولادك يعني ايه ونس ويعني ايه عيله ويعني ايه أصحاب وانت ماجربتش الشعور ده في حياتك ولازلت بتعاني منه
لما تكتشف انك في نفس المرحله و الشغور اللي طفلك بيمر بيه
لانك مااشبعتش الشعور ده في المرحله دي في حياتك أنت
ايه تاني
لما تكتشف انك مجبر تستمر مع سارق ونسك في علاقتك بيه
الوعي بالنفس والمشاعر والاحتياج مش بس بينقظك انت ويحافظ علي صحتك النفسيه وراحتك النفسيه و كفاءتك في الحياه
ده كمان بيحافظ علي حقوق اولادك و نفسيتهم و حياتهم كلها
هل انت شخص اتسرق منه الونس ؟ ............